Transporte Ferroviario
Nesta modalidade de transporte cabe distinguir fundamentalmente dúas liñas de actuación.
Por unha banda, na liña ferroviaria convencional, no marco do convenio entre o Ministerio de Fomento, Renfe e a Xunta de Galicia para a modernización da rede ferroviaria interior galega, estanse a realizar importantes melloras na mesma, orientadas basicamente á renovación de vías, establecemento de medidas de seguridade, supresión de pasos a nível...
Por outro lado, a construción dunha rede de altas prestacións que permitirá a Galicia contar con conexións intrarrexionais (entre as distintas cidades de Galicia) e interrexionais (fundamentalmente entre Galicia e a Meseta) coas características propias deste tipo de infraestruturas.
Esta rede estará conformada polos seguintes corredores:
- Eixo Atlántico de Alta Velocidade, que unirá Ferrol con Tui, e a súa correspondente conexión con Portugal, favorecida pola construción da saída sur ferroviaria de Vigo.
- Ourense-Lubián, que permitirá a conexión de Galicia coa Meseta.
- Corredor cantábrico, que unirá Ferrol con Bilbao, e con iso a totalidade da costa cantábrica.
- Corredor subcantábrico, Ponferrada-Monforte.
- A Coruña-Lugo, que forma parte do corredor subcantábrico.
- Ourense-Lugo, que unirá directamente as dúas provincias interiores.
- Ourense-Vigo.
- Ourense-Santiago de Compostela.
Coa culminación destes corredores, Galicia disporá dunha rede de infraestruturas ferroviarias competitivas con calquera outro modo de transporte.
